Malagasy (mg-MG) 
French (fr-FR) 
English (United Kingdom) - Antsipiriany
- Atolotr'i : Ratovoarivelo Ndrasantsoa Marie Frédeline
- Sokajy : Ireo kintan'ny finoana
- Mpamaky : 5
I Masindahy Odilon no tsaroana ny 04 janoary. Teraka ny taona 962 tao Saint-Cirgues (Haute-Loire) i Odilon. Tompomenakely tao Mercœur ao Auvergne ny fianakaviany ary nanana tany nanelanelana an'i Brioude sy Langeac. Nanomboka ny fiofanana ho Chanoine tao amin'ny fiangonan'i Masindahy Julien tao Brioude izy.
Tamin'ny taona 991 no nanintona an'i Odilon ny fiainan'i Mayeul, lehiben'ny fikambanana tao Cluny ka nanapa-kevitra ny hanara-dia an'i Mayeul izy ary nanampy azy tao ka tonga "coadjuteur". Rehefa maty i Mayeul, mpitantana fahefatra io trano fitokana-monina tao Cluny io tamin'ny taona 994 dia i Odilon no voafidy handimby azy.
Nandray anjara mavitrika tamin'ny fanavaozna tao Cluny izy, anisan'izany ny fiverenana amin'ny fitsipika entitra nomen'i Masindahy Benoît, ny fitondran-tena matotra, ny fanekena, ny fanajana ny voadin'ny fahantrana, ny fahadiovana ary ny fahambonian'ny fiainam-pivavahana sy ny fibanjinana.
Nanana finiavana sy zotom-po tsy azo laizina i Odilon. Fanta-daza izy tamin'ny fanehoam-pitiavana sy ny asa fiantrana tsy nahalalany sasatra. Noheverina ho toy ny Papa tao amin'ny fikambanan'ny Bénédictins mihitsy izy, ary nanana fifandraisana akaiky tamin'ny Papa sy ny Amperora. Ny taona 1006, raha niaina tao anatin'ny mosary ny vahoaka dia namidiny avokoa ny fananany mba hanampiana ireo mosarena ary niara-nangataka tamin'ireo mahantra izy. Izy no nandravina ny fifandirana nisy tamin'izany fotoana izany. Izy ihany koa no nampisy voalohany tao amin'ny fikambanana ny fahatsiarovana ireo mpino nodimandry isaky ny 02 novambra ka ny taona 998 no nankalazana izany voalohany.
Ny 14 septambra 1025 no nanorina ny trano Sainte-Croix tao Lavoûte-Chilhac izy. Nanatrika ny fametraha ny Amperora Concrad II i Odilon tamin'ny taona 1027. Ny taona 1031 dia nolaviny ny fanendrena azy ho arseveka tao Lyon.
Nametraka dindo sarotra kosehina sy mafonja tao amin'ny fikambanana tao Cluny ny fampianarana sy ny hevitra teôlôjika nentin'i Odilon. Nahatratra 70 ny isan'ny ankohonam-piainanan'ny fikambanana tao Cluny tamin'ny fotoana nahafatesan'i Odilon ny 31 janoary 1049. Tamin'io fotoana io no nanaovany fitsidihana tao Souvigny ary tao ihany izy no nalevina.
Ny hoe Odilon dia avy amin'ny fiteny germanique hoe "odo": harena sy "ilde": ady. Ireo Odilon dia tsy tia manasaro-javatra. mitady izay hampirindra sy hahasambatra ao amin'ny fianakaviana izy ka raha tsy mahatsapa an'izany dia lasa mikombona samirery ao anatiny ao. Marani-tsaina ireo Odilon saingy manana olana amin'ny fandraisana fanapahan-kevitra.
- Antsipiriany
- Atolotr'i : Ratovoarivelo Ndrasantsoa Marie Frédeline
- Sokajy : Ireo kintan'ny finoana
- Mpamaky : 3
I Masimbavy Geneviève no ankalazaina ny 03 janoary. Teraka ny taona 423 tao Nanterre i Masimbavy Geneviève. Mbola zaza izy dia efa nanolo-tena tamin'Andriamanitra.
Tsikaritr'i Masindahy Germain d'Auxerre sy Masindahy Loup de Troyes izany fahamasinan-toetrany izany tamin'ny fandalovan'izy ireo tao Nanterre tamin'ny taona 429 raha izy ireo ho any Bretagne. Vao 16 taona monja i Geneviève no nifidy ny hanolo-tena ho an'Andriamanitra sy ny niaina ny famolahan-tena.
Teo amin'ny faha-28 taonany i Geneviève no nandresy lahatra ireo mponina tao Paris mba tsy handao ny tànana notamihan'ireo mpandromba nantsoina hoe Huns. Nankahery ireo mpiara-monina taminy izy ka hoy izy: "Aleo handositra izay lehilahy hanao izany raha tsy afaka miady izy, fa isika vehivavy hangataka amin'Andriamanitra fa hihaino ny talahontsika Izy". Tamin'izay dia tsy voaroba i Paris.
Nisy mosary ny taona 465, niaina tao anaty hanoanana ny mponina ka i Geneviève no nitady sakafo ho azy ireo. Novakiany ireo sakana manamorona an'i Seine ka hatrany Troyes mba ahafahany mitady hanina ho an'ny mponina.
I Geneviève ihany koa no nanorina fiangonana teo amin'ny fasan'i Masindahy Denis, eveka voalohany Lutèce (anaran'i Paris fony faha romanina). Izy ihany koa no nandresy lahatra an'i Clovis hanorina fiangonana mitondra ny anaran'i Masindahy Pierre sy Paul teo amin'ny tendrombohitra nantsoina hoe Mons Lucotitius antsoina hoe tendrombohitr'i Masimbavy Geneviève ankehitriny, ao Paris Ve moa no ahitana izany.
Nodimandry ny 03 janoary 512 tao Paris i Geneviève teo amin'ny faha-89 taonany ary nalevina tao amin'io fiangonana io ihany teo akaikin'i Clovis. Nankinina tamin'ny Bénédictins io fiangonana io ary taty aoriana dia ny Chanoines Séculiers no nitantana azy.
I Masimbavy Geneviève no mpiaro ny tànanan'i Paris sy ny diôsezin'i Nanterre. Marihana ankehitriny dia hajaina any amin'ny fiangonana Saint-Etienne-du-Mont ny vata misy an'i Geneviève raha avy ao amin'ny fiangonana Masindahy Pierre sy Paul tamin'ny voalohany dia nalefa tany Draveil nandritra ny fanafihan'ny Normands. Nijanona tao io hatramin'ny tanona 853. Rehefa nikasa hanafika an'i Paris indray ny Normands dia nafindra tany amin'ny toerana tsy misy ady io vata misy an'i Geneviève io. Ny 08 novambra 793 dia nentina tany Monnet io vata io ka nodoran'ny "Conseil Général de Paris" rehefa avy noviravirain'ny vahoaka. Araka ny tantara anefa, alohan'io fotoana io dia efa nisy vata iray nitehirizana ny ila sandriny izay nalefa tany amin'ny fiangonana Saint-Etienne-du-Mont ka izay no mahatonga azy mbola hajaina ao amin'ny fiangonana io hatramin'izao.
Ny ho Geneviève dia avy amin'ny fiteny gérmanique hoe "geno": tsara firazanana sy hoe "wifa": vehivavy; izany hoe "vehivavy tsara firazanana". Olona matanjaka amin'ny asa ary mahavita be ireo Geneviève. Mandanjalanja izy ireo ka miezaka mamantatra izay hatao aloha vao manatanteraka. Mikatsaka hatrany marina sy ny maharitra izy ireo ary mandray andraikitra.
- Antsipiriany
- Atolotr'i : Ratovoarivelo Ndrasantsoa Marie Frédeline
- Sokajy : Ireo kintan'ny finoana
- Mpamaky : 3
Hatramin'ny fanovana nataon'ny Papa Paul VI, dia ankalazaina miaraka ny fetin'i Masindahy Basile sy i Grégoire de Naziance. Samy teraka tany Cappadoce nanodidina ny taona 330 izy mirahalahy ireto. I Basile avy any Césarée fa i Grégoire kosa avy any Nazianze. Samy nipoitra avy amina fianakaviana tena kristianina izy ireo.
- Antsipiriany
- Atolotr'i : Ratovoarivelo Ndrasantsoa Marie Frédeline
- Sokajy : Ireo kintan'ny finoana
- Mpamaky : 16
Arahabaina isika mianakavy nahatratra izao taona vaovao izao. Enga anie ity taona ity hitondra hafaliana sy fiadanam-po ary indrindra mba hampanjakantsika mianakavy ny rariny sy histiny eo amin'ny fiaraha-monina. Fa ankalazaina amin'izao fiandohan'ny taona izao i Masina Maria Renin'Andriamanitra. Arahabaina manokana ireo arovan'izany Renin'Andriamanitra izany.